Ulloq 12. maj 2000 UPA 2000/09
Namminersornerullutik Oqartussat missingersuutaat pillugit Inatsisartut inatsisaata nr. 8-ip 29. oktober 1999-imeersup allanngortinneqarneranik Inatsisartut inatsisissaattut siunnersuut
pillugu
ISUMALIUTISSIISSUTInatsisartut Inatsisit Atortinneqarnerannut Ataatsimiititaliaannit
inatsisissatut siunnersuutip aappassaaneerneqarnissaanut saqqummiunneqartoq
Inatsisartut Inatsisit Atortinneqarnerannut Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Anders Andreassen (S), siulittaasoq
Inatsisartuni ilaasortaq Olga Poulsen (IA)
Inatsisartuni ilaasortaq Lars Karl Jensen (S)
Inatsisartuni ilaasortaq Anders Nilsson (A)
Inatsisartuni ilaasortaq Anthon Frederiksen (K)Siunnersuut saqqummiunneqartoq naapertorlugu aningaasanut inatsisip akuersissutigineqarnissaa "1. december nallertinnagu" pisartussanngorlugu kinguartitsisoqassaaq.
Siunnersuut Inatsisartut ukiakkut ataatsimiittarnerisa kinguartinneqarnissaannik Naalakkersuisuniit kissaateqartoqarnera tunngavigalugu saqqummiunneqarpoq, tassa Inatsisartut ataatsimiilernissaat qaammammik ataatsimik sioqqullugu ullormut oqaluuserisassanngortinniakkanik tunniussereersimanissamik piffissaliinerup kingunerissammagu Naalakkersuisut inatsisiliassanik piareersaanerata ilangaatsiarsuata aasaanerani sulinngiffeqarnerup nalaani (taannaluunniit sioqqullugu) pisarnissaa, Naalakkersuisullu isumaat naapertorlugu tamanna pitsaavallaarnavianngilaq.
Tamatuma kingunerisaanik Inatsisartut 2000-imi upernaakkut ataatsimiinneranni Kalaallit Nunaanni Inatsisartut Suleriaasiannut allannguutissatut siunnersuummik saqqummiussisoqarpoq. Siunnersuutip kingunerisaanik piffissaq Inatsisartut ukiakkut ataatsimiinnerata aallartittarfissaa septemberip qaammataani tallimanngornerit aappaanniit pingajuannut kinguartinneqassaaq. (Taamaammat Inatsisartut Suleriaasiata allannguuteqarneratigut Inatsisartut ukiakkut ataatsimiilernerata ullut 14-it tikillugit kinguartinneqartussaaneranik missingersuusiortarnermut inatsisip allanngortinneqarnissaanik siunnersuummut saqqumiussissummi oqaaseqaatitaanilu oqartoqarmat tamanna eqqortuunngilaq. Taamaallaat sapaatip akunneranik ataatsimik kinguartinneqassaaq).
Taamatulli kinguartitsinerup kingunerissavaa piffissaq aningaasanut inatsisip akuersissutigineqareersimaffissaa kinguartinneqanngippat piffissap Inatsisartut aningaasanut inatsimmik suliarinniffissaata sivikillinera. Naalakkersuisut tamanna qissimigaarlugu siunnersuutigaat piffissaliussaq pineqartoq qaammammik ataatsimik kinguartinneqassasoq.
Inatsisit Atortinneqarnerannut Ataatsimiititaliap tusarniaanernit akissutit Naalakkersuisut inatsisissatut siunnersuutip uuma saqqummiunnera sioqqullugu oqartussaasunit kattuffinnillu il. il. pissarsiarisimasaasa nuutinneri siunnersuutip suliarinerani atugassamisut pissarsiarisimavai.
Inatsisit Atortinneqarnerannut Ataatsimiititaliap paasivaa tusarniaaffigineqartut uku akissuteqarsimasut:
Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik aamma KANUKOKA. Oqaatigineqarportaaq inatsisissatut siunnersuut Naalakkersuisut Allattoqarfiata inatsisilerisoqarfianut oqaasiinnartigut oqaloqatiginnissutigineqarsimasoq.
Missingiusiaq allakkatigut martsip 17-ianneersutigut tusarniaassutigalugu nassiunneqarsimavoq, ullorlu akissutit tiguneqareersimaffissaat martsip 23-annut killilerneqarsimalluni.
Inatsisit Atortinneqarnerannut Ataatsimiititaliap oqaatigissavaa isumaqarluni piffissaliussaq taanna akuersaarneqarsinnaanngitsumik sivikippallaarujussuartoq.
Minnerunngitsumik KANUKOKA-mut tunngatillugu pissutsit taamaapput, taassumami tusarniaaffigineqaraangami inatsisissatut siunnersuutip pineqartup kommuninut ataasiakkaanut saqqummiunnissaanut naammattumik piffissaqartinneqartarnissaa pisariaqarpoq.
Inatsisit Atortinneqarnerannut Ataatsimiititaliap tusarniaanernit akissutinik tunniussinissamut piffissaliussat sivikippallaartarneri arlaleriaqaluni isornartorsiortarpai - kingullermillu taamaaliorluni Namminersornerullutik Oqartussat missingersuutaat pillugit Inatsisartut inatsisissaattut siunnersuutip Inatsisartut 1999-imi ukiakkut ataatsimiinneranni ataatsimiititaliamit suliarineqarneranut atatillugu. Taamaammat ataatsimiititaliap assut ajuusaarnartippaa paasigamiuk inatsisissatut siunnersuutit tusarniaassutigalugit nassiunneqaraangata akissuteqarnissamut piffissaliunneqartartut suli ima sivikitsigisut allaat oqartussaasut kattuffiillu attuumassuteqartut tusarniaaffigineqarnerminnit akissutinik imaqarluartunik saqqumiussinissaminnut periarfissaqartinneqartaratik. Innuttaasut oqartussaaqataatillugit naalakkersuinikkut ingerlaatsimi tunngaviit inatsisiliallu pitsaasuunissaasa innimiginissaat taamaaliornikkut sumiginnarneqartarput.
Tamanna tunngavigalugu Inatsisit Atortinneqarnerannut Ataatsimiititaliap Naalakkersuisut kaammattussavai inatsisissatut siunnersuutit, siunnersuutit soorpiarneri apeqqutaatillugit, sapinngisamik sivikinnerpaamik sapaatip akunnerinik sisamanik akissuteqarnissamut piffissaliilluni tusarniaassutigalugit nassiunneqartarnissaat qulakkeeqqullugu.
KANUKOKA’p tusarniaaffigineqarnermini akissutaani atuarneqarsinnaavoq kommunit arlallit siunnersuut annertuumik nangaanartoqartikkaat. Tamatumani pingaartumik innersuussutigineqarpoq aningaasatigut missingersuusiassanut siunnersuutip Inatsisartut ataatsimiinnerini oqaluuserineqarnerani, sanaartugassat ingerlatsinermullu aningaasartuutit eqqarsaatigalugit, kommunit aningaasatigut missingersuusiaannut sunniuteqartunik allannguuteqarajuttarnera.
Taamaammat KANUKOKA’p inassutigaa tulleriinneri malillugit Namminersornerullutik Oqartussat missingersuusianik akuersissuteqartarnerisa kommunillu aningaasatigut missingersuusianik akuersissuteqartarnerisa qaammammik ataatsimik nikinganerat aalajangiusimaannarneqassasoq.
KANUKOKA’p tusarniaaffigineqarnerminit akissutaa isumaliutissiissummut uunga ilanngussatut ilaatinneqarpoq.
Kommunit aningaasatigut missingersuusiamik suliarinerini naammaginartunik atugassaqartinneqarnissaat Inatsisit Atortinneqarnerannut Ataatsimiititaliamit pingaartutut isigineqarpoq. Taamaammat Inatsisit Atortinneqarnerannut Ataatsimiititaliap KANUKOKA’p oqaaseqaatai annertuumik isumalioriarnartutut isigai.
Inatsisilli Atortinneqarnerannut Ataatsimiititaliap maluginiarpaa Naalakkersuisut kommunit aningaasatigut missingersuusiornerini ajornartorsiuteqartoqalinnginnissaata qulakkeerniarneqarnissaa kommunit ataqatigiissaareqatiginerisigut anguniarniaraat.
Inatsisit Atortinneqarnerannut Ataatsimiititaliap tamatumunnga peqatigitillugu aningaasanut inatsisissaq pillugu isumaqatigiinniarnerit naalakkersuinikkut oqallinnissanut piffissaqarsinnaanngorlugu aaqqissuunneqartarnissaat pingaartippaa aammalu innuttaasut soqutigisaqaqatigiikkuutaallu tamanut ammasumik oqallinnissaminnut, taamaalillutillu naalakkersuinikkut isumaqatigiinniarnernut sunniuteqarsinnaanissaminnut, mattunneqannginnissaat pingaartillugu.
Tamanna tunngavigalugu Inatsisit Atortinneqarnerannut Ataatsimiititaliap isumaqatigiittup piffissap aningaasanut inatsisip akuersissutigineqarfissaata kinguartinneqarnissaata akuersissutigineqarnissaa taperserpaa. Ataatsimiititaliap ullunik 14-inik kinguartitsisoqarnissaa taperserpaa, taamaalillunilu piffissap aningaasanut inatsisip akuersissutigineqarfissaata "15. november nallertinnagu" pisartussanngorlugu aalajangiiffigineqarnissaa taperserlugu.
Taamaammat ataatsimiititaliap iluarisimaarlugu paasivaa Naalakkersuisut allannguutissatut siunnersuutinik ataatsimiititaliap kissaataanut naapertuuttunik siunnersuutip matuma aappassaaneerneqarnissaanut saqqummiussilersaartut.
Inatsisit Atortinneqanerannut Ataatsimiititaliap isumaqatigiittup inassutigissavaa Namminersornerullutik Oqartussat missingersuutaat pillugit Inatsisartut inatsisaata allanngortinneqarneranik Inatsisartut inatsisissaattut siunnersuut Naalakkersuisut allannguutissanik taaneqartunik saqqummiussereerpata iluseriligassamisut iluseqarluni Inatsisartunit akuersissutigineqassasoq.
Anders Andreassen, Siumut
Ataatsimiititaliap siulittaasuaOlga Poulsen, Inuit Ataqatigiit
Lars Karl Jensen, Siumut
Anders Nilsson, Atassut
Anthon Frederiksen, Kattusseqatigiit